أكد حسن موسى المدير التنفيذي للزمالك، أنه فور الاستعداد لعقد جمعية عمومية بالنادي سيتم الدعوة لانتخابات الزمالك.
انتخابات الزمالك القادمة
وقال حسن موسى في تصريحات تليفزيونيه ببرنامج “الماتش” عبر قناة (صدى البلد): “الحمد لله أول مرة أحس أن كل شعب الزمالك ورموزه وقيادته الإدارية والفنية كلموني أنهم في ضهر الزمالك، والكل مستعد يعمل أي حاجه علشان النادي يكون رقم واحد وده أول مرة أشوفه”.
وتابع: “شايف تكاتف مثمر وحسيته فعلا من الجميع، وسعيد جدا ومتفائل من أول يوم أن مستقبل الزمالك بخير”.
وشدد موسى: “الزمالك غني بأبنائه وقياداته، ومفيش مشكلة واحدة علشان حد يذكرها حصلت اليوم، وأي مشكلة ظهرت اتحلت بسهولة، وبطمن الجمهور والأعضاء المستقبل جميل ومثمر”.
وأردف: “الكل متكاتف وكل الأزمات في ملف اتحط قدام رموز النادي وأخطروني أن مفيش أزمات مالية أو إدارية وكل الأمور هتتحل، رموز النادي ورجال الأعمال متكاتفين وحسيت بده وأول 24 ساعة الدنيا تمام وماشية في الطريق الصح”.
وأضاف موسي: “ملف فريق الكرة يعتبر متأخد أشواط جامده فيه، وإن شاء الله زيزو وفتوح هيبقوا موجودين مع الفريق، في جلسة مع المدرب بكرة وكل الأمور هتتحل إن شاء الله وهتتفحص كل طلباته وهتتنفذ”.
وأكمل: “معنديش فكرة عن تجديد ولكن اول ما اعرف أن فتوح هيجدد هقول، جالي تليفون أن كابتن زيزو باقي في الزمالك وده كان من رجال أعمال”.
وواصل: “الأمور الفنية هتدرس مع مدير النشاط الرياضي، أول لما هنبلغ الجهة الإدارية إننا جاهزين للجمعية العمومية هنبدأ في إجراءات الانتخابات”.
وأختتم: “بطمن الجمهور جدا جدا وتفاءل الزمالك ثم الزمالك ثم الزمالك”.
